Эмоционалды интеллектінің жоғары деңгейі адамға өз эмоцияларын бақылауға ғана емес, сонымен бірге қоршаған ортадағы жағдайды басқаруға мүмкіндік береді. Мұндай өзін-өзі бақылау өмірдің барлық саласында жетістікке жетуге ықпал етеді.
Корпоративтік оқыту аясында 2021 жылдың 11 маусым күні «Назарбаев Зияткерлік мектептері» ДББҰ Педагогикалық шеберлік орталығы «Әлеуметтік сезімталдық: басқалардың эмоциясын түсініп үйренеміз» тақырыбында кезекті вебинар өткізді. Педагогикалық шеберлік орталығының тренерлері Көпжасарова Т.М., Каирова Д.Т., Маторина Е.А. және Жансүгірова Ж.Д. әлеуметтік сезімталдықтың эмоционалды интеллектінің түрі ретіндегі маңыздылығын талқылады.
Спикерлер вебинар қатысушыларына эмоционалды интеллект деңгейін анықтауға көмектесіп, қарым-қатынастағы вербалды емес белгілердің маңыздылығын атап өтті және эмпатияны қалай дамыту керектігі туралы әңгімеледі.
Әртүрлі жаттығу, тестілер және актерлік ойын практикумы вебинарға қатысқан 200-ге жуық адамнан қолдау тапты. Оқыту барысында қатысушылар тарапынан сұрақтар қойылып, оларға өмірден алынған мысалдар келтірілді және басқа адамдардың эмоцияларын түсіну бойынша құнды кеңестер берілді.