2022 жылы 28 қаңтар күні NIS Педагогикалық шеберлік орталығы ұйымдастырған вебинарда «Креативті ойлауға қалай үйрету керек?», «Креативті идеяларды ойлап табудың жолы қандай?», «Креативті түрде өзін-өзі көрсету деген не?» сұрақтары талқыға түсті. Тренерлер Раушан Әбішева мен Қаламқас Әбдікәрімова жұмыс кезеңдеріне, мектеп сабақтары үлгісінде идеяларды іске асырудың сипаттамалары мен тәсілдеріне егжей-тегжейлі тоқталды.
3000-ға жуық қатысушыға өнертапқыштық есептерді шешу теориясы, синектика және оқу процесін жетілдіруге арналған пайдалы кеңестер берілді. Тренерлер функционалдық сауаттылықты қалыптастыру бойынша тапсырмаларды креативті ойлау дағдыларын жетілдіруге бағытталған тапсырмалардан ажырату қажеттілігін атап өтті.
Мұғалімдерге аталған алгоритмге сәйкес өз пәні бойынша креативті ойлауды дамытатын тапсырмаларды пайдалану міндеті қойылған лайфхактар байқауы ұсынылды.