Жаңалықтар

2022 жылы 8 сәуір күні бағдарлама қонақтары Қазақ ұлттық өнер академиясының профессоры, «Құрмет» орденінің иегері, әлемнің ең танымал отыз суретшісінің бірі Ағымсалы Дүзелханов және Қазақстан Республикасы Суретшілер одағының мүшесі, Қазақ ұлттық өнер академиясының сәндік-қолданбалы өнер оқытушысы Гүлназия Қастеева болды. Әбілхан Қастеев атындағы музей-үйінде өткен кездесуді Педагогикалық шеберлік орталығының аға менеджері Абай Қалшабек жүргізді.

Ағымсалы Дүзелханов графикалық және бейнелеу өнерінің өткені, бүгіні және келешекте дамуы туралы әңгімеледі; «Қорқыт», «Абылай хан», «Әбілқайыр хан», «Әйтеке би», «Қазыбек би», «Төле би» көркем туындыларының жарыққа шығу тарихымен бөлісті. «Әліппе», «Бейнелеу өнері», «Музыка», «Ежелгі Қазақстан тарихы», «Қазақ тілі» және басқа да жаңа буын оқулықтарында ұсынылған иллюстрациялар бойынша жұмыстарға айрықша тоқталды. Бүгінде оның картиналары Қазақстан мен Түрікменстан президенттерінің резиденцияларынан ерекше орын алған.

Еліміздің барлық өңірінен «Назарбаев Зияткерлік мектептері» ДББҰ-ның 300-ге жуық қызметкері Ұлттық валютаның нобайы қалай дайындалғанын, Гүлназия Қастеевамен бірлескен жұмыс жайында, сондай-ақ олардың болашақ мамандығын таңдауға ықпал еткен, шабыт сыйлаған жандар мен мұғалімдер туралы білді.