«Назарбаев Зияткерлік мектептері» ДББҰ Педагогикалық шеберлік орталығының бастамасымен 2021 жылдың 21–23 маусым аралығында Қарағанды облысының Жезқазған, Балқаш, Сәтбаев қалалары мен Ұлытау ауданы педагогтерінің біліктілігін арттыру бойынша «Қазақмыс» Корпорациясы» ЖШС-мен ауқымды жоба шеңберінде оқытуға белсенді қатысқан 25 педагог үшін Нұр-Сұлтан қаласында «Білім беру туры» ұйымдастырылды. Бұл шара Педагогикалық шеберлік орталығымен ынтымақтастық аясында «Қазақмыс» Корпорациясы» ЖШС әлеуметтік жобасының бір бөлігі болып табылады және корпорация кәсіпорындары орналасқан аудандар мен қалалар халқының өмір сүру сапасы мен қызметін арттыруға бағытталған.
Жоба ерекшелігі – облыстан шалғай орналасқан мектептердің, соның ішінде шағын жинақталған мектептер педагогтерінің кәсіби дағдыларын дамытудың бірегей мүмкіндігі. Мұғалімдер «Саралап оқыту», «Тиімді сабақты көлденең және тігінен жоспарлау», «Оқытудың тиімді нысандары мен әдістері», «Авторлық бағдарламаларды әзірлеу» тақырыптары бойынша семинарларда оқудан өтеді. Семинарлар практикалық бағытта және Педагогикалық шеберлік орталығының тренерлерімен өткізіледі.
Мұғалімдер оқу барысында Назарбаев Зияткерлік мектебі және Нұр-Сұлтан қаласының жалпы білім беретін мектептерімен танысады. Кешкі уақытта білім беру турының қатысушылары үшін Ұлттық музейге, NUR ALEM болашақ энергиясы музейіне, «Астана Опера» Мемлекеттік опера және балет театрына бару туралы мәдени бағдарлама ұйымдастырылады.
Семинар қорытындысы бойынша сертификаттар беріледі.