Жаңалықтар

«Шабыт» корпоративтік бағдарламасы аясында 2021 жылдың 24 қыркүйегінде «Назарбаев Зияткерлік мектептері» ДББҰ қызметкерлерінің жазушы, ғалым-мәдениеттанушы, дипломат, мемлекет және қоғам қайраткері, «Парасат» және «Құрмет» ордендерінің иегері Мұрат Әуезовпен онлайн кездесуі өтті. Кездесу Алматы қаласындағы Қазақстан Республикасының Ұлттық кітапханасынан тікелей көрсетілді.

«Назарбаев Зияткерлік мектептері» ДББҰ Басқарма Төрайымының орынбасары Ольга Ивановна Можаева қонағымызды жылы шыраймен қарсы алып, бағдарламаға қатысушылардың ғалымның шығармашылығына, әкесі Мұхтар Әуезовтің әдеби мұрасына деген жоғары қызығушылығын атап өтті.

Мұрат Мұхтарұлы әңгімесін: «Әкем ұлы ұстаз ғана емес, ұлы тәрбиеші болған» деген сөздерімен бастады. Ол жазушының әдеби мұрасы, оның еңбектерінің мәдениет пен әдебиеттегі рөлі мен маңызы, қазақ халқының рухани дамуы туралы үлкен тебіреніспен айтып берді. Сондай-ақ «Жас тұлпар» ұйымының негізгі идеясы ұлттық сана-сезім мен ата-баба тарихын насихаттау болғанын ерекше атап өтті.

Ғалым көрермендердің сұрақтарына жауап бере отырып, «Абай жолы» роман-эпопеясының жас ұрпақты тәрбиелеудегі маңыздылығына ерекше тоқталып, тектілік пен адамгершілік, қазіргі қоғам өміріндегі әдебиеттің рөлі туралы ойларымен бөлісті.

Кездесуге еліміздің барлық өңірінен 600-ден астам қатысушы онлайн қосылды, сұрақтар қойып, танымды әңгімесі үшін қонағымызға алғыстарын білдірді.