«Назарбаев Зияткерлік мектептері» ДББҰ Педагогикалық шеберлік орталығы республикалық тамыз конференциясы аясында 12–14 тамыз аралығында ZOOM платформасы арқылы мектеп басшыларына, пән мұғалімдеріне, сынып жетекшілері мен мектеп психологтеріне арналған бірқатар секциялық отырыстар өткізуді жоспарлап отыр.
Секцияларды өткізу барысында жұмыс шағын топтарда ұйымдастырылады, фасилитацияланған сессиялар қарастырылған, онда мұғалімдер Педагогикалық шеберлік орталығының тренерлерімен пікір алмасып, жаңа жағдайдағы оқыту мен оқу мәселелерін талқылайды.
Мектеп басшыларына арналған «Қашықтан оқыту жағдайында педагогтерге әдістемелік қолдау көрсетуді ұйымдастыру» секциялық отырыс аясында онлайн фасилитацияланған сессияда педагогтердің кәсіби қажеттіліктері, қашықтан оқыту жағдайында оқытудың тиімділігі қарастырылатын болады.
Педагогтерді әдістемелік қолдау, сараланған оқыту, әрбір оқушыға қолдау көрсетуге арналған оқытудың тиімді формалары мен әдістері пән мұғалімдерінің онлайн-семинарларында қаралатын болады.
Сынып жетекшілері мен психологтер өз секцияларында Педагогикалық шеберлік орталығының тренерлерімен бірлесіп қашықтан оқыту жағдайында оқушылар мен ата-аналарға психологиялық қолдау көрсету жайлы талқылайды.
Жалпы, республиканың жалпы білім беретін мектептерінен 30 мыңнан астам басшы мен педагог қатысады деп жоспарлануда.