2021 жылдың 21 сәуірінде «Назарбаев Зияткерлік мектептері» ДББҰ Педагогикалық шеберлік орталығы «Ауыл мектебі» жобасын жүзеге асыру аясында ZOOM платформасында «Ауыл мектебі мұғалімінің тәжірибесі» тақырыбында екінші республикалық семинар өткізді. Семинарды ұйымдастыруға ПШО-ның Көкшетау және Қызылорда қалаларындағы филиалдары бастамашы болды.
Семинардың мақсаты – оқыту және оқу тәжірибесін жақсарту үшін ауыл мектептері педагогтерінің тәжірибе алмасуы. Семинарға 6 облыстың 900-ден астам педагог қызметкерлері қатысты.
«НЗМ» ДББҰ Басқарушы директоры А.Ө. Қазжанова өзінің баяндамасында «Ауыл мектебі» жобасының білім беруді дамытудағы маңыздылығын атап өтті. «НЗМ» ДББҰ Тәжірибені тарату департаментінің директоры Г.К. Балғабаева аталған жобаны өңірлерде жүзеге асыру барысы туралы айтып берді.
Мектептегі өзгерістерді басқарудың мәселелерін талқылау барысында Қарағанды және Шығыс Қазақстан облыстарындағы ауыл мектептерінің басшылары өз тәжірибелерімен бөлісті.
«Кәсіби даму зертханасы: пәндік білімді тереңдету», «IT-студия: Web 2.0 сервистерін оқыту үдерісіне кіріктіру» секцияларының отырсында тренингтер және әртүрлі пәндер бойынша шеберлік сабақтар өтті.
Қашықтан оқыту жағдайында белсенді және интербелсенді оқыту әдістері, Learning Apps платформасында интербелсенді тапсырмаларды әзірлеу, Classtime сервисті қолдану арқылы оқушыларды интербелсенді бағалау бойынша талқылау ерекше қызығушылық тудырды.
