2020 жылы 20–21 мамыр күндері «Назарбаев Зияткерлік мектептері» ДББҰ Педагогикалық шеберлік орталығы тренерлердің біліктілігін арттыру мақсатында «Қазақстандық тренер: тәжірибе, ынтымақтастық және даму перспективалары» атты IX Республикалық семинар өткізді. Осындай ауқымдағы іс-шара алғаш рет онлайн түрінде өткізілді.
Семинар тақырыбы – «Қашықтан білім беру: дәстүрлер мен инновацияны қалай біріктіруге болады». Семинар қашықтан оқыту жағдайында педагогикалық кадрлардың біліктілігін арттыру жүйесін дамыту мәселелерінде Қазақстан Республикасы педагогтерінің біліктілігін арттыруды жүзеге асыратын тренерлерді кәсіби дамыту мақсатында тәжірибе алмасудың диалогтік алаңына айналды.
Тіркелген қатысушылар саны Педагогикалық шеберлік орталығы мен филиалдарының тренерлері, сондай-ақ Қазақстан Республикасының жалпы білім беретін мектептерінің тренер-педагогтерімен қоса алғанда 280 адамды құрады.
Семинарға Қазақстан Республикасы Білім және ғылым министрлігінің өкілдері, Ресей, Эстония және Қазақстанның білім беру саласының сарапшылары қатысты.
Семинар аясында қашықтан оқытуды ұйымдастырушылық-әдістемелік қолдау мәселелері қарастырылды, Ресей мен Эстонияның педагогтерінің әдістемелік қолдау көрсету мен қашықтан оқытуды ұйымдастыру тәжірибелерінен мысалдар келтірілді, қашықтан жұмыс істеу жағдайында ұжымдық жұмысты тиімді ұйымдастыру мәселелері талқыланды.
Педагогикалық шеберлік орталығының тренерлер тобының жетекшілігімен веб-қосымшаларды практикалық пайдалануда семинарға қатысушылардың өзара белсенді іс-қимылын ұйымдастыру мақсатында онлайн-квест өткізілді.
Қатысушылар семинардың ұйымдастырылу динамикасы мен интербелсенділігін, спикерлердің сөз сөйлеуінің мазмұндылығын, тренерлердің кәсіби дамуы үшін берілген ақпараттың маңыздылығын атап өтті.
