12 қарашада «Отбасы, мектеп, қауымдастық: бала мүддесіне қызмет етеміз» ХІІ Халықаралық ғылыми-тәжірибелік конференциясының екінші жұмыс күні Педагогикалық шеберлік орталығы «Балалардың игілігі үшін мектептерді бірлесе дамытамыз» тақырыптық алаңын ұйымдастырды. Секция модераторы Жанбота Қабдыкәрімова Назарбаев Зияткерлік мектептерінің тәжірибесін тарату және серіктестермен бірлесе табысты іске асырылған педагогтердің кәсіби дамуы бойынша 5 білім беру жобасын назарға ұсынды.
Пленарлық бөлімде «Bilim Media Group» ЖШС директоры Рауан Кенжеханұлы, «Қазақмыс» Корпорациясы» ЖШС дамыту жөніндегі директоры Бақтияр Қырықпышев, Ж. Досмұхамедова атындағы колледж директорының орынбасары Зәуреш Қосжанова, Атырау облыстық әдістемелік орталығының директоры Дана Баймашова, Қызылорда облыстық оқу-әдістемелік орталығының директоры Сырым Асқаров сөз сөйледі. Спикерлер педагог кадрларды даярлау, білім беру ортасында әл-ауқат құру, ауыл мектептерін дамыту және білім беру сапасын арттыру үшін білім беру бастамаларын ілгерілету мәселелерін талқылады.
Іс-шараға 500-ден астам қатысушы жиналды, олар тақырыптық алаңдарға, яғни «виртуалды бөлмелерге» бөлінді. Батыс Қазақстан, Солтүстік Қазақстан, Атырау, Қызылорда, Қарағанды облыстарынан келген әріптестер тақырыптық алаңға тікелей қосылды. Қатысушылар педагогтердің кәсіби даму жобаларымен танысуға мүмкіндік алды: «Ж. Досмұхамедов атындағы жоғары педагогикалық колледжінде білім беру мазмұнын жаңғырту және білім беру процесін ұйымдастыру», «Ауыл мектебі», «Жетістікке бірге жетеміз», «Жетекші мектептер қоғамдастығы», «Қазақмыс» Корпорациясы» ЖШС қолдауымен Қарағанды облысының педагогтерін кәсіби дамыту».
Тақырыптық алаңға қатысушылардың ашық диалогы мектептегі өзгерістерді басқарудың өзекті мәселелерін талқылауға, оқу мен оқытуға өзгерістер енгізуге, мұғалімдердің цифрлық және зерттеу дағдыларын дамытып, әлеуетін арттыру үшін жетекші мектептердің серіктестіктермен өзара әрекеттесуіне мүмкіндік берді.
