Жаңалықтар

Дөңгелек үстел жұмысына еліміздің барлық аймағынан мыңға жуық мектеп мұғалімдері, сондай-ақ отандық және шетелдік ғалымдар мен сарапшылар қатысты. Білім берудегі жасанды интеллект, оның дамуы қалай жүреді, заманауи мұғалім қандай цифрлық құзыреттіліктерге ие болуы керек және болашақ мектебі қандай болуы тиіс деген мәселелер талқыланды.

Білім берудің негізгі субъектілері – оқытушылар мен оқушылар арасындағы байланыс қалай өзгереді? Жасанды интеллект мұғалімге көмектесуге қабілетті ме? Ол мұғалім үшін қандай жаңа мүмкіндіктер мен перспективаларды аша алады? Бұл туралы НЗМ ДББҰ Басқарма Төрайымы Күләш Шамшидинова өз пікірін білдірді.

НЗМ ДББҰ Басқарма Төрайымының орынбасары Светлана Испусинова қатысушылардың назарын жасанды интеллект дәуіріндегі мұғалімнің жаңа кәсіби дағдылары мен біліктілігінің маңыздылығына аударды.

Білім беру саласындағы шақырылған сарапшы, Ювяскюль университеті (Финляндия) тобындағы EduCluster Finland инновациялар және сыртқы байланыстар жөніндегі директоры Дэвид Марш өзінің құнды тәжірибесімен бөлісті. Ол өз сөзінде жасанды интеллект оқытуды жақсарту үшін жақсы көмекші және бағалы құрал екенін атап өтті.

Спикерлердің баяндамалары ақпараттық қанықтығымен ерекшеленді. Мәселен, Швейцариядан келген профессор Амандип Сингх Гилл білім берудегі цифрлық технологиялардың келешегі жөнінде ой бөлісті; «Әлем мұғалімі» жаһандық сыйлығының амбассадоры, «Қазақстан мұғалімі – 2020» Ұлттық сыйлығының жеңімпазы Динара Бейсембаева цифрлық технологиялардың мектеп практикасының сапасына әсері туралы зерттеу нәтижелерін ұсынды. Қостанайлық мектеп мұғалімі Жахонгир Гаппаров физика сабағында жасанды интеллект құралдарын қолдану тәсілдері туралы айтып берді. 

Дөңгелек үстел қорытындысын шығарған Күләш Ноғатайқызы барлық қатысушыға мәселелерді сындарлы талқылай білгені үшін алғыс айта келіп, мұғалімге сапалы оқытуда жасанды интеллектіні қалай тиімді және дұрыс қолдану керектігін, сәтті жұмыс істеу үшін қандай цифрлық дағдылар мен үйрене білуді меңгерудің маңыздылығына назар аударды. Мұғалімнің орны теңдессіз екенін баса көрсетіп, сыпайылық, үлкендерге құрмет, Отанға деген сүйіспеншілік, парыз сезімі, адалдық, ынтымақ және өзара көмек сияқты өмірлік құндылықтарды мұғалім ғана қалыптастыра алатынына айрықша тоқталды.