Негізгі қызмет

Қазақстан Республикасы Білім және ғылым министрлігінің 2016 жылғы 28 қаңтардағы №95 бұйрығымен бекітілген «Педагогтердің біліктілігін арттыру курстарын ұйымдастыру және өткізу ережесінің» 30-тармағына сәйкес Педагогикалық шеберлік орталығы (бұдан әрі – ПШО) педагогтердің қызметін курстан кейін сүйемелдеуді жүргізіп келеді. Курстан кейінгі сүйемелдеудің негізгі мақсаты оқу мен оқыту үдерісінде кәсіби қиыншылықтарды табу арқылы білім беру ұйымдарының педагогтеріне уақытында әдістемелік көмек беру болып табылады.

Білім беру ұйымдарының педагогтеріне курстан кейінгі әдістемелік қолдау мынадай бағыттар бойынша жүзеге асырылады:

• оқыту мен оқу әдістемесі, соның ішінде оқытудың қашықтық форматындағы оқыту әдістемесі;

• жаңартылған бағдарламалар мазмұны және бағалау жүйесі;

• педагогикалық қызметтегі зерттеу тәжірибесі;

• тәрбие жұмысын ұйымдастыру;

• білім беру ұйымдарын басқару.

ПШО Қазақстан Республикасындағы педагог кадрларды курстан кейінгі сүйемелдеуге және әдістемелік қолдауға көмек көрсетудің екі тәсілін белгіледі.

I. Каскадтық тәсіл – бұл көшбасшылық функцияларды орындайтын жетекші мектептер ұжымдарының желісі арқылы: ПШО – ЖЕТЕКШІ МЕКТЕП – СЕРІКТЕС МЕКТЕП.

ҚР педагогтерінің қызметін курстан кейінгі сүйемелдеуге және әдістемелік қолдауға көмек көрсетудің каскадтық тәсілінің тетігі:

• жетекші мектеп мұғалімдерінің сабақтарын бірлесіп қадағалау (серіктес мектептер мұғалімдерінің қатысуымен);

• сабақтарды қадағалау қорытындылары бойынша мұғалімге жеке сындарлы кері байланыс жасау;

• тәжірибе барысында табылған проблемалар мен қиыншылықтарды бірлесіп талқылау және шешу жолдарын іздестіру;

• жетекші мектептердің педагогикалық ұжымына арналған оқыту іс-шараларын (семинар, тренинг, шеберлік сабағы) өткізу;

• жетекші мектептердің мұғалімдерімен бірлесе отырып, серіктес мектептер педагогтерінің қатысуымен кәсіби сұраныстарды шешуге бағытталған оқыту іс-шараларын жоспарлау;

• кәсіби дамытудың нақты бағыттары бойынша әдістемелік актив мүшелеріне арналған ұсынымдар әзірлеу;

• оқыту мен оқудағы өзгерістерді белгілеу үшін сабақтарды қайталап қадағалау.

II. Әдістемелік активтің жұмысы – ҚР педагог кадрларын курстан кейінгі сүйемелдеуге және әддістемелік қолдауға көмек көрсетудің екінші тәсілі.

Әдістемелік актив арқылы педагогтердің қызметін курстан кейінгі сүйемелдеуді ұйымдастыру біліктілікті арттыру жүйесін мектепке жақындатуға және «теңбе-тең» қағидасы бойынша мұғалімдерді оқытуға мүмкіндік береді.

ҚР жалпы білім беретін мектептері үшін ПШО барлығы 48326 мектеп тренерлерін даярлады, бұл жалпы білім беру ұйымдарындағы мұғалімдердің жалпы санының 16%-ын құрайды.